‘സത്’, ‘സംഗം’ എന്നീ രണ്ടു വാക്കുകൾ ചേർന്നാണ് സത്സംഗം എന്ന വാക്ക് ഉണ്ടായിട്ടുള്ളത്. ‘സത്’ എന്നാൽ സത്യം എന്നാണർത്ഥം. ‘സംഗം’ എന്നാൽ കൂട്ടം, സംഘം, കൂട്ടായ്മ എന്നൊക്കെയാണ് അർത്ഥം. ഗുണവന്മാരായ ആളുകളുടെ കൂട്ടത്തിൽ ചേരുക, സത്യത്തിന്റെ കൂട്ടത്തിൽ ചേരുക, എന്നൊക്കെയുള്ള അർത്ഥവും ഇതിന് കലിപ്പിക്കുന്നതാണ്. ആത്മീയ വിഷയങ്ങളിൽ താല്പര്യമുള്ള വ്യക്തികളോടൊപ്പം ചേരുക, അവരുമായി അത്തരം മൂല്യങ്ങൾ പങ്കുവയ്ക്കുക എന്നതാണ് ഈ വാക്കുകൊണ്ട് ഉദ്ദേശിക്കുന്നത്. ആത്മീയ വിഷയങ്ങളെക്കുറിച്ച് ചർച്ച ചെയ്യുന്നതിനായുള്ള ഒത്തു ചേരലും സത്സംഗം തന്നെയാണ്.

ഒരാളുടെ അഹം ബോധത്തെ കുറച്ചു കൊണ്ടുവരാൻ സഹായിക്കുന്ന നല്ലൊരു മാർഗമാണ് സത്സംഗം. സത്സംഗത്തിൽ ഉയർന്നുവരുന്ന കരുണാർദ്രമായ ചിന്തകൾ, പ്രവർത്തികൾ എല്ലാവരിലും ആത്മീയമായ ഉണർവ് സൃഷ്ടിക്കാൻ പര്യാപ്തമാണ്. പതുക്കെ പതുക്കെ ആ ഉണർവ് എല്ലാവരും ഒന്നുതന്നെയാണെന്ന ഏകത്വ ബോധത്തിലേക്ക് ഒരാളെ നയിക്കും.